喺香港，大家都會襯重陽節登高、祭祖，所以本會特意喺噚日舉辦巴士遊活動，希望大家可以舒展身心，迎接寒冬。雖然我哋喺前晚先至得知DA3需要留廠嘅消息，幸好我哋已經即時啟動「危機處理」，即晚安排好旅遊巴，令活動可以繼續進行。
活動嘅第一站係 G.H. Watt 車廠。老闆得知我哋嘅參加者都非常欣賞古董巴士之後，不但答應開放車廠俾活動參加者參觀，其中一位員工仲主動將四部「鎮廠之寶」——喺伯明翰生產嘅MCW Metrobus型號巴士駛出廠外列陣，方便大家參觀、影相。
至於當日嘅主角——喺九十年代幾乎喺每一條巴士路線出現過嘅前城巴「利蘭奧林比安」型12米冷氣巴士，更加令人驚豔！呢架車係1992年落地嘅385號車，老闆話呢架巴士經過歷時兩年多嘅翻新工程，車身嘅每一塊金屬傍板都換成全新組件，引擎、波箱都翻修妥當，唔少得嘅當然係內籠嘅大清潔同改善。配合英國冬天嘅潮濕氣候同泥濘嘅地面，佢哋更喺上車門附近加裝咗地毯，避免乘客鞋上嘅泥同水整濕同整污糟車廂地板。 開車之後，大家都完全感受到有budget嘅威力——架車完全無29年車齡嘅疲態。康明斯LT10引擎係當年香港巴士嘅標準配備，用以應付冷氣機組、加長車身同乘客嘅重量。雖然老闆錫住架車嚟揸，但係喺燈位起步、加速時，乘客都可以感受到少少推背感。有趣嘅係，我哋嘅遊河本來喺下午一點半完結，但係老闆話難得大家坐得咁開心，仲帶大家去多咗個工業區，等大家可以利用長鏡練習一下「港式巴士攝影」添！
而本會嘅「丹尼士禿鷹」巴士 #DA3 經過搶修之後，終於喺午飯時間後亮相。雖然我哋需要縮短喺李斯特城嘅遊河時間，但係相信大家都感受到兩款車嘅分別——我哋嘅禿鷹無論乘坐感、起步加速、避震，甚至係司機（港式揸巴士），都係比較粗獷，皆因兩款車設計嘅用途唔同。禿鷹巴士係為港島區嘅山路而設計，而城巴嘅利蘭巴士主力用於港島北市區（電車路）同埋高速公路，所以利蘭巴士唔係無力，但係佢相對於對手丹尼士，就顯得比較含蓄。呢個分別，亦都解釋到點解現時仲有其他香港利蘭巴士喺英國作為「coach」服務，而丹尼士巴士就⋯⋯無曬。
最後，多謝有份幫手同埋出席嘅每一位。肉麻啲講，你哋嘅參與係我哋工作嘅意義所在，因為巴士係用來接載乘客、喺路上行走嘅。坦白講，參觀完G.H. Watts之後，小編都獲益良多，因為老闆就係身體力行咁保育咗好多當地嘅舊巴士，而且佢哋都可以繼續接載乘客，賺取足以應付保育經費嘅收入，絕對值得我哋借鏡。
出年嘅活動，如無意外都會喺四月左右舉辦。本會今年嘅活動告一段落，但係我哋嘅工作未完，亦都唔會完。希望出年可以繼續見到大家。